განათლებისა და მეცნიერების მინისტრის მოადგილის ნუნუ მიცკევიჩის განცხადებით, ის აბიტურიენტები, ვისაც კორონავირუსი დაუდასტურდებათ, ეროვნულ გამოცდებს არ გამოეთიშებიან.
მისი თქმით, პირებს, რომლებსაც საგამოცდო პერიოდში COVID-19 გამოუვლინდებათ, შეფასებისა და გამოცდების ეროვნული ცენტრი, საგანგებოდ შედგენილი ცხრილის მიხედვით, შესაბამის საგანში გამოცდას 2 კვირის შემდეგ ჩაუტარებს.
საგამოცდო პროცესში მონაწილე პირებისთვის დაავადებათა კონტროლისა და საზოგადოებრივი ჯანმრთელობის ეროვნული ცენტრისა და შრომის ინსპექციის სამსახურის მიერ განსაზღვრული რეკომენდაციები ასეთია:
⏩ მაქსიმალურად დაიცვან სოციალური დისტანცია
⏩ მუდმივად ეკეთოთ პირბადე, როგორც გამოცდებზე რეგისტრაციის დროს, ასევე გამოცდების მიმდინარეობისას
⏩ დაიმუშავონ ხელები ადგილზე განთავსებული სადეზინფექციო ხსნარით
ამავდროულად, გამოსაცდელთა და მეთვალყურეთა დაშვება მოხდება მხოლოდ ყოველი საგამოცდო სექტორის ფართობის 50%-ზე.
თითოეული სამუშაო მაგიდა წინა მხრიდან აღჭურვილი იქნება გამჭვირვალე დამცავი ფარით/ბარიერით;
მაგიდებს შორის დაშორება იქნება მინიმუმ 2 მეტრი, ერთმანეთის მიმდევრობით განლაგებულ მაგიდებს შორის მანძილი კი – 1 მეტრი.
კონდიციონერები ირთვება 30° გრადუსზე მაღალი ტემპერატურის პირობებში.
პირბადის ტარების წესი გავრცელდება საგამოცდო პროცესში მონაწილე ყველა პირზე.
ერთიანი ეროვნული გამოცდები 1-ელ ივლის დაიწყება და 25 ივლისს დასრულდება.