რამდენიმე თვის წინ ცნობილი გახდა, რომ 10-წლიანი თანაცხოვრების შემდეგ მსახიობი თაკო ტაბატაძე და მუსიკოსი გია ბაღაშვილი ერთმანეთს დაშორდნენ. წყვილის დაშორებას საზოგადოების ნაწილის მხრიდან უარყოფითი გამოხმაურება მოჰყვა.
როგორც თაკო ტაბატაძემ ერთ-ერთ ინტერვიუში განაცხადა, მისი ოჯახისთვის უფრო რთული აღმოჩნდა ეს ყველაფერი, მის კარიერასა და საქმიანობაზე კი გავლენა არ მოუხდენია.
"ამ ამბავთან დაკავშირებით ათასი სისულელე დაიწერა სოციალურ ქსელში... ჩემი ოჯახისთვის უფრო რთული იყო ეს ყველაფერი. ძალიან ტრადიციული ოჯახიდან ვარ და ძალიან დიდი ბოდიში მინდა მოვუხადო მათ, რომ ამხელა სტრესის ქვეშ აღმოჩნდნენ. ოჯახის დანგრევა მოხდა 3 წლის წინ. თუმცა, რომ გითხრათ, რომ ამან რაიმე გავლენა მოახდინა ჩემს საქმიანობასა და კარიერაზე, არა. გამიკვირდა უბრალოდ, რომ თურმე ამდენი ადამიანი იყო ჩასაფრებული. მეცოდებიან ეს ადამიანები, რომ ასე ცუდად გრძნობენ თავს, რომ ასე იმეტებენ ადამიანს" - განაცხადა თაკომ "პოსტ TV"-ის ეთერში.
რამდენიმე დღის წინ მსახიობმა სოციალურ ქსელში მის შესახებ სტატიაზე ("ნახეთ, როგორ სახლში ცხოვრობს თაკო ტაბატაძე გია ბაღაშვილთან დაშორების შემდეგ") დაწერილი კომენტარის სქრინი გამოაქვეყნა: "სადაც არ უნდა იცხოვროს, ბოზი ბოზია, ნამუსი რომ ჰქონდეს, თავს თუ არ მოიკლავს, მინიმუმ თავი არსად გამოყოს, მაგრამ ამისნაირებს ნამუსი აღარ აქვთ".
როგორც თაკო ტაბატაძე წერს, კომენტარის ავტორი სპეციალურ პენიტენციურ სამსახურში მუშაობს. მან უწყებას კითხვითაც მიმართა: "გამარჯობა, მაინტერესებს, ცოტა უხერხულად არ გეჩვენებათ, ასეთი თანამშრომელი რომ გყავთ?"
"იქნებ, იკადროთ და გაგვცეთ პასუხი. ფაქტია, ნახეთ ჩემი შეტყობინება. ვინ არის ეს კაცი და მუშაობს თუ არა თქვენთან?" - წერს თაკო ტაბატაძე სოციალურ ქსელში.