Anonymous-ის ცნობით, ჰაკერებმა რუსეთის ტელეარხებზე კიბერთავდასხმა განახორციელეს, რის შედეგადაც მაყურებელს საინფორმაციო გამოშვების ნაცვლად უკრაინის დაბომბვის ამსახველი კადრების ნახვა მოუწია. აღნიშნული ინფორმაციის ამსახველ ვიდეოკადრებს ჰაკერთა დაჯგუფება "ტვიტერზე" აქვეყნებს.
როგორც Anonymous-ი წერს, 6 მარტს გატეხეს რუსული სერვისები Wink-ი და Ivi და რუსული ტელეარხების საინფორმაციო გამოშვებების დროს დაბომბვის კადრებთან ერთად, ომის საწინააღმდეგო მოწოდებებიც გაუშვეს.
"ეს ომი გაჩაღებულია პუტინის ავტორიტარული რეჟიმის მიერ რუსეთის ჩვეულებრივი ხალხის სახელით", - მსგავსი განცხადებები ისმოდა რუსული სატელევიზიო არხებიდან.
მათივე ცნობით, კიბერთავდასხმა ცოტა ხანს გაგრძელდა და რუსული ტელეარხების მაუწყებლობა მალევე აღდგა.
ცნობისთვის, ეს Anonymous-ის მიერ რუსულ სატელევიზიო მედიაზე კიბერთავდასხმის მეორე შემთხვევაა. მანამდე ჰაკერებმა რუსულ ტელეარხებზე უკრაინის ჰიმნი გაუშვეს.
მსოფლიო ჰაკერთა გაერთიანებამ პუტინს კიბერომი უკრაინაში შეჭრის გამო გამოუცხადა.