ინგა ჟორჟოლიანის ცხოვრება მოულოდნელად 14 წლის წინ, საქართველოში შეიცვალა. ქალი, რომელიც მხოლოდ სწავლასა და კარიერაზე ფიქრობდა, მოულოდნელად არჩევანის წინაშე აღმოჩნდა... ამერიკელი დიპლომატის შონ ქერსის გრძნობები იმდენად ძლიერი იყო, რომ წყვილის სიყვარულის ისტორია სვეტიცხოველში ჯვრისწერით გაგრძელდა. შონ და ინგა ქერსები უკვე წლებია ამერიკაში ცხოვრობენ. მათი ყოველდღიურობა ძალიან ფერადია, ზრდიან ორ შვილს, მოგზაურობენ.
ქართულ ტრადიციულ ოჯახში გავიზარდე, მთავარი ღირებულებით: "ყველა წარმატება ფუჭია, სათნოების გარეშე", რასაც ჩემი მშობლები ყოველდღიურად გვახსენებდნენ. საქართველოში ფილოსოფიის სოციალურ მეცნიერებათა და ბიზნეს მენეჯმენტის განათლება მივიღე. პარალელურად ვსწავლობდი უცხო ენებს და ვმუშაობდი თარჯიმნად. პატარა ასაკში რთული იყო საპასუხისმგებლო სამსახურისა და სწავლის დაბალანსება. ცოტა დრო მრჩებოდა მეგობრებისა და გართობისთვის, თუმცა ადრეულ ასაკშივე მქონდა გააზრებული, რომ სწავლა-განათლება და ბევრი შრომა აუცილებელი იყო წარმატებისთვის.
ჩვენი გაცნობის ისტორია ფილმის სიუჟეტს მოგაგონებთ. შონი საქართველოში გავიცანი. ჩემი იმჟამინდელი ცხოვრების წესიდან გამომდინარე, პირადი ცხოვრება ნაკლებად მაინტერესებდა, 23 წლის ასაკში ოჯახის შექმნაზე არც მიფიქრია. ერთ დღეს, მეგობარმა ვახშამზე დამპატიჟა, ბოდიში მოვუხადე და უარი ვუთხარი, რადგან მეორე დღეს გამოცდები მეწყებოდა, თუმცა ბოლოს მაინც დამითანხმა, რომ ცოტა ხნით მაინც მივსულვიყავი. ვახშამზე მიწვეული იყო შონიც. მისვლისთანავე გამეცნო, ბევრი ვილაპარაკეთ, ისეთი შეგრძნება დამეუფლა, თითქოს დიდი ხნის მეგობრები ვიყავით. ადვილად მისახვედრი იყო, რომ მოგვეწონა ერთმანეთი. შონი იმ დროს სამხედრო დიპლომატი იყო, მოკლევადიანი მისიით გახლდათ საქართველოში. დამშვიდობებისას მთხოვა, რომ მეორე დღეს შევხვედროდი, რაზეც უარი ვუთხარი, რადგან მთელი დღე უნივერსიტეტში უნდა ვყოფილიყავი. მან ჩემი აღფრთოვანება მეორე დღესვე მოახერხა მისთვის უცხო ქვეყანაში - გაღიმებული უნივერსიტეტის კარებთან დამხვდა, სიცილით მითხრა, რომ მთელი ღამე ვერ დაიძინა, დაღლილი იყო, მაგრამ ასევე ძალიან ბედნიერი.ასე დაიწყო ჩვენი თავგადასავალი და სიყვარულის ისტორია. მოკლე დროში შეძლო დავერწმუნებინე, რომ ნამდვილი სიყვარული იპოვა.
ამჟამად მყავს ორი შვილი: თერთმეტი წლის ქრეიგი და ექვსი წლის ჰოლი. ქრეიგი დაკავებულია სპორტით ძალიან კარგად სწავლობს და ასევე გატაცებულია პლანეტების შესწავლით და მეცნიერებით. ჰოლი, ამჟამად მსახიობობაზე ოცნებობს, თუმცა როგორც ყველა ექვსი წლის გოგონას ოცნებები, მისიც ხშირად იცვლება.
სტატიების ნახვა შეგიძლიათ ამ ბმულზე
ახალი ამბების ნახვა შეგიძლიათ ამ ბმულზე